Comments

Ako hanyar haja bulik dari kampong. Tulak mambawa anak-anak cuti sakulah ka kampong. Ako sampai di Teluk Intan pukul 2 pm. Sadangnya ai makan tangahari di Kadai Mastan Ghani. Lawasnya hudah kada makan mee rebus. Harganya RM2.30 sapinggan. Pekerja nang tuha-tuhanya dah kadada talihat lagi. Banyak babinian malayu yang bagawi. Ako nginum ais laici RM0.60 sagelas. Anak ko nginuman cendol RM1.20, ais bandung RM1.00 wan F&N tin RM1.40. Imbahtu balalah mambawa anak naik menara jam tinggi. Rigatnya kada sakira. Banyaknya tahi burung merpati di railing wan pelaluan ditingkat satu. Kadada yang mambarasihi.

Imbah naik jam tinggi, tulak manukar hundang di Pasar Mini Sakupang di higa Klinik APPU. Hundang ganal-ganal harganya cuma RM8.00 sakilo. Amun di KL mau maniga puluhringgit sakilo sako. Ako nukar dua kilo. Handak makan hundang masak sambal patai wan hundang masak butter. Kaka ku hudah manukar patai di Simpang 3 Sungai Manik. 7 papan RM2.00. Ganal-ganal pulak tu matanya. Jar patai matan Tapah.

Imbah batutukar lauk, tulak pulang katapak pasar malam dihiga stesen bas Teluk Intan. Harga kuih dah naik. 3 bigi RM1.00 tagal saiz nya ganal dari kuih yang ada di KL. Ada ai jualagi yang bajual 4 RM1.00. Kada banyak urang pasalnya hanyar pukul 3 pm masa tu. Ako manukar tapai hubi, ada yang bapundut awan daun pisang wan ada yang dalam plastik. Ako nukar yang dalam plastik, RM1.00 sabungkus. Dengar habar pasar malam nak dipindahkan kakawasan intang Masigit Malayo. Ku itihi hudah ai ditabur depa batu dikawasan nginto.

Hari Isnin ako tulak maulah mykad di pejabat pendaftaran Teluk Intan. Tulak jam 9 pagi. Pukul 10.30 hudah talah. Urang kada banyak tagal 3 jua kaunter yang buka. Daftar mati, daftar urang baranak wan maulah mykad sunyaan disitu. Itu yang lawas sikit kana mahadangi. Amun ada nasib, ada chan la dapat hadiah Myvi, cabutan bertuah maulah mykad.

Bulik dari maulah mykad tarus karumah maambili anak, handak balalah ka Parit 3B Sg Manik. Kaka hudah baulah wadai kipeng badurian. Ada jua buah durian, manukar di Kuala Sg Manik. Lapas jua dandaman handak makan wadai kipeng, tagal sauting jua yang kada dapat. Kadada wadik. masa ni bandang urang hanyar imbah batanam. Iwak gen kadada yang ganal.

Masa ni dapatlah serba sadikit cerita pasal urang minyak yang heboh di Sg Manik. Yang kana tangkap di Tukang Sidin tu hudah dilapasakan pasal kadada bukti. Hidin kana tangkap masa dirumah, kadanya di rumah mangsa. Laporan suratkhabar kada tapakai. Sunyaan kada bujur! Ada ai ako malihat gambarnya. Urangnya dah nak butak kapalanya. Ngini jar urang katuhanya. Ada dua tiga urang lagi anak muridnya. Ada yang menyambat anak muridnya ada 7 urang, ada yang menyambat 3, kada tahu mana yang bujur. Anak muridnya banyak bagana di parit sabalah A. Jar ada di Parit 1A, Parit 2A wan 6A. Salah saurang mangsa jar anak imam masigit parit 2. Umurnya 19 tahun. Hidin guring balampas di anjung pasal banyak kulaan umpat guring dirumah. Kejadian berlaku antara pukul 12 malam hingga pukul 1.30 pagi. Mangsa yg lain kada mau marepotakan ka polis, takutan jatuh air muka jar. Ada yang jumpa salawar urang minyak tu tagal habis sunyaannya dibakar. Bukti-bukti i.e salawar kana tatak/gunting, kesan-kesan sunyaan hudah dimusnahkan. Kayapa handak mendakwa. Malam hari minggu sudah ada lagi kes urang minyak di parit 8.

Urang minyak tu hudah ditangkap polis pada hari Rabu pasal kada maikut syarat pelepasan sebelum tu. Masa di lapasakan minggu sudah, syaratnya hidin kana hadir di balai polis tiap-tiap 2 hari sekali.

Carita pasal urang minyak, di Kg Bahagia gen ada jua urang minyak yang meambil kesempatan (copycat). Urang kg Bahagia gen umpat jua bajaga malam. Amun ada maklumat, satumat jua kakawanan di Sg Manik dapat tahu. maklumlah, sunyaan ada baisi handphone. Urang hudah bisa be SMS san napa. Di Kg Bahagia satu malam tu gigir urang basasah urang minyak di Lorong 2.Ada urang minyak manaiki bilik anak dara (anak kawanko). Kakanakan dari Sg Manik gen umpat jua mangapung urang minyak. Tuhuk ai jar manyasah urang minyak, sampai tacabur dalam parit. Bacalumut seawakan urang minyak tu tih. Bila disuluhi awan suar, kalinya si Aliyashak banarai. Aliyashak ni memang sunyaan pinando, penagih dadah Kg Bahagia, anak aruah Ibrahim Yaakob, mantan calon ADUN PAS kawasan Changkat Jong. Cah! Kada mangaruan.